ZIARA YA KATA KWA KATA WILAYA YA KINONDONI YAANZA LEO

Tarehe iliyowekwa: April 1st, 2021

Mkuu  wa Wilaya ya Kinondoni Mhe. Daniel Chongolo,  ameanza ziara yake leo na kukutana na wananchi wakazi wa Kata ya Mbezi Juu katika mkutano wa hadhara uliofanyika katika  ofisi za Kata ya Mbezi Juu ikiwa ni utekelezaji wa mikakati ya kusikiliza na kutatua kero za wananchi katika ziara yake ya Kata kwa Kata.

 Amesema huu ni wakati muafaka wa kukutana na wananchi katika Kata zao na kujua zipi changamoto zinazowakabili ikiwa ni pamoja na kutoa nafasi kwa wananchi kusikilizwa na kupatiwa majibu stahiki kutoka kwa wataalamu wa Manispaa.

"Nimeamua kufika katika maeneo yenu kuweza kusikiliza Changamoto zenu na kuzipatia ufumbuzi kwani najua kuna baadhi ya wananchi wanapata ugumu kufika ofisini kwangu kunieleza Changamoto zao." Ameongeza Mhe Chongolo.

Naye Diwani wa kata hiyo Mhe. Anna Lukindo amesema wamefurahishwan na uamuzi wa Mkuu wa Wilaya kufika kwenye Kata yao na kutatua changamoto mbalimbali zilizokuwa zikiwakabili wananchi  zikiwemo za Ardhi, Barabara, Shule na masoko.

Katika ziara yake hii Mhe. Chongolo amefanikiwa kusikiliza kero zipatazo 38, na kuzipatia ufumbuzi kupitia wataalam alioambatana nao.

Ziara hii  ni endelevu kwa  Kata zote 20 za Halmashauri na itahusisha wataalam mbalimbali kutoka Halmashauri, Dawasco, TAKUKURU pamoja na Polisi.

Imeandaliwa na

Kitengo cha Habari na Uhusiano

Manispaa ya Kinondoni.