KINONDONI YAZINDUA ZOEZI LA UTOAJI WA ELIMU YA UMUHIMU WA KUJIANDIKISHA NA UHUISHAJI WA TAARIFA ZA MPIGA KURA

Tarehe iliyowekwa: May 4th, 2024

Halmashauri ya Manispaa ya Kinondoni kupitia Kitengo cha Uchaguzi, imezindua rasmi zoezi la uhamasishaji na utoaji wa Elimu juu ya umuhimu wa kujihakiki na kuhuisha taarifa za Wananchi katika daftari la kudumu la Wapiga kura . Zoezi hilo limezinduliwa Mei 4, 2024 na timu maalum ya uhamasishaji na utoaji wa elimu ikiongozwa na Afisa Uchaguzi wa Halmashauri ya Manispaa ya Kinondoni Bi. Latifa Ramadhan ambapo imewakutanisha makundi mbalimbali ya watu hasa vijana walio na miaka 18 na kuendelea.

Bi. Latifa alisema  kuwa leo wamezindua rasmi zoezi ambalo limejikita katika kuwaelimisha Wananchi kwa makundi mbalimbali juu ya umuhimu wa kujiandikisha na kuhakiki taarifa zao katika daftari la kudumu la wapiga kura hasa katika kipindi hiki ambacho tunaelekea katika uchaguzi wa Serikali za Mitaa mwaka huu. "Leo tumezindua zoezi letu na tumefanikiwa kutoa elimu na kuhamasisha makundi mbalimbali hasa vijana ambao wanaonekana kuwa nyuma kidogo kushiriki katika masuala mazima ya uchaguzi, hivyo niwaombe Wananchi kutoka mitaa yote 106 ya Manispaa ya Kinondoni kushiriki ipasavyo katika kuhuisha taarifa zao muhimu katika daftari la kudumu la wapiga kura," alisema Bi. Latifa.

Aidha, Bi Latifa alisema kuwa, kuelekea uchaguzi wa Serikali za Mitaa utakaofanyika mwaka huu, ni jukumu na wajibu wa kila Mwananchi mwenye vigezo vya kuchagua na kuchaguliwa kwenda kuhakiki taarifa zake katika daftari la kudumu la Wapiga kura mara zoezi hilo litakapotangazwa ili kila Mwananchi awe na haki ya kuchagua na kuchaguliwa baada ya kukidhi vigezo vitakiwavyo. Mbali na hayo pia Afisa uchaguzi huyo alisema kuwa moja ya vigezo vya msingi vinavyotakiwa ili mtu aweze kupiga na kupigiwa kura ni kuwa Mtanzania, awe na umri kuanzia miaka 18 na kuendelea, awe na akili timamu na pia awe amejiandikisha katika daftari la kudumu la mpiga kura ndani ya eneo husika.