KAMPENI YA KUGAWA DAWA ZA MINYOO, MATENDE NA MABUSHA YAZINDULIWA KINONDONI

Tarehe iliyowekwa: November 21st, 2022

Katibu Tawala wa Wilaya ya Kinondoni Bi.  Stella Msofe leo Jumatatu, Novemba 21, amemwakilisha Mkuu wa Mkoa wa Dar es Salaam  Mhe. Amos Makalla katika  uzinduzi wa zoezi la utoaji wa dawa za minyoo, matende na mabusha kimkoa  lililofanyika katika shule ya msingi Tandale, Kata ya Tandale Wilaya ya Kinondoni.

Akizungumza wakati wa uzinduzi huo, aliwataka wananchi wote wa mkoa wa Dar es Salaam   kushiriki kikamilifu ili kufikia lengo la kuwezesha walengwa wote wenye umri wa miaka mitano na kuendelea kupata dawa za kudhibiti madhara ya magonjwa hayo kwa kushirikiana na watoa huduma na viongozi wa Serikali za mitaa kama yalivyofanikishwa mazoezi mengine zikiwemo chanjo mbalimbali zilizofanyika kwa nyakati tofauti kwa mafanikio.

Aidha, alisisitiza umuhimu wa kuondokana na fikra na dhana  potofu zinazoenezwa na Watu wasio na nia njema kuwa dawa hizo zina madhara kwani hazina ukweli na zimethibitishwa kitaalamu kuwa ni salama.

Alisisitiza kuwa hakuna Serikali ambayo inawapenda watu wake kama ya Tanzania inayoweza kuwaletea wananchi wake kitu chenye madhara badala yake inapambana kuwaletea tiba kinga ya kupunguza au kuondoa madhara ya magonjwa haya hususani katika Wilaya za Kinondoni na Temeke zilizothibitika kuwa na maambukizi makubwa katika mkoa wa Dar es Salaam.

Katika uzinduzi huo wataalam wa Afya walianza kwa kutoa maelezo  ya vigezo vya ugawaji wa dawa hizo kwa kuzingatia umri, kimo na uzito kisha kutoa dawa kwa kuzingatia vigezo hivyo.

Waliohudhuria katika uzinduzi huo na kunywa dawa hizo ni pamoja na Katibu Tawala wa Wilaya ya Kinondoni Bi. Stella  Msofe ambaye alikuwa mgeni rasmi, mwakilishi wa  Wizara  ya Afya kutoka Makao Makuu Dodoma, mwakilishi kutoka TAMISEMI, Mganga Mkuu wa Mkoa, Mganga Mkuu wa Wilaya, wawakilishi wa dini, Walimu, wanafunzi , Wakazi wa Tandale na Wadau wengine wa Afya katika Mkoa wa Dar es Salaam wakiwemo wawakilishi  kutoka MDH.

Wakizungumza katika ugawaji wa dawa hizo za kinga Tiba wote walisisitiza kuwa kuwa dawa hizo zimethibitishwa kitaalam kuwa ni salama na hazina madhara na kwamba wasioruhusiwa kutumia ni watoto chini ya umri wa miaka mitano na wajawazito.

Imetolewa na Kitengo cha Mawasiliano Serikalini:

HALMASHAURI YA MANISPAA YA KINONDONI.