TIMU YA MPIRA WA MIGUU KMC YAPANDA DARAJA NA KUINGIA LIGI KUU TANZANIA BARA.

Posted on: February 5th, 2018

 NI BAADA YA KUICHAPA JKT MLALE BAO MOJA BILA KATIKA MTANANGE ULIOFANYIKA KATIKA VIWANJA VYA MAJIMAJI MJINI SONGEA. 

 KUFUATIA USHINDI HUO, KINONDONI YAAHIDI KUFUNGUA ACADEMY KWA LENGO LA KUKUZA VIPAJI VINGI ZAIDI. 

 Hatimae timu ya mpira wa miguu ya KMC imefanikiwa kupanda daraja na kuingia ligi kuu Tanzania bara baada ya mtanange makali kati yake na JKT Mlale na kuichapa  bao Moja kwa sifuri katika mechi iliyochezwa leo viwanja vya Majimaji Mjini Songea. 

 Katika goli lililofungwa dakika ya 45  na kiungo mshambuliaji Abdulhahim Humudi liliamsha hisia za mashabiki wa KMC na kuwavunja nguvu mashabiki wa upinzani wa JKT Mlale pale walipoona dakika zikiyoyoma pasipo matumaini. 

 Mpaka mpira unamalizika KMC iliibuka kidedea kwa kuongoza bao Moja  huku mpinzani wake  akiambulia patupu.

 Kwa upande wake Mstahiki Meya wa Manispaa ya Kinondoni Mh Benjamin Sitta ambae alihudhuria mtanange huo ameonesha kufurahishwa kwake na ushindi uliopatikana na kuahidi kuendelea kuipa sapoti timu hiyo katika mechi za ligi kuu na kuongeza Kuwa Manispa ya Kinondoni inadhamira ya kufungua academy itakayoibua vipaji vingi zaidi.

 Naye mwalimu wa timu Bw Frederick Minzilo amesema ushindi huo waliutegemea kwani timu  ilijiandaa vizuri na ilikua na ari kubwa ya ushindi.

 Imetolewa na
 Kitengo cha Habari na Uhusiano.
 Manispaa ya Kinondoni.