MTOTO AKILINDWA NA KUTHAMINIWA IPASAVYO NI HAZINA KUELEKEA UCHUMI WA KATI WA VIWANDA

Posted on: June 14th, 2018

Ni kauli yake Mh Phares Lupomo,Diwani Kata ya Mbezi juu alipokuwa mgeni rasmi katika maadhimisho ya siku ya mtoto wa Afrika yenye kauli mbiu isemayo "Kuelekea uchumi wa kati wa viwanda, tusimwache nyuma mtoto " yaliyofanyika katika kata yake ya Mbezi juu,  kwa kuwahusisha watoto katika michezo mbalimbali .

Amesema, lengo la maadhimisho hayo pamoja na vitu vingine ni kumuunganisha, kumchochea na kumkumbusha mzazi wajibu wake kwa mtoto ambaye ndiye taifa tegemezi kuelekea uchumi wa kati wa viwanda.

"Tulipofikia hapa Kama viongozi tunatakiwa kukumbuka kwamba nasi pia tulikuwa watoto hivyo nawaomba wadau wote tuungane pamoja kuwaandalia kesho njema watoto wetu kwa kujali, kulinda na kuwapa stahiki zao za msingi leo" .Amesema Mh Phares.

Naye Afisa Maendeleo ya jamii wa Kata hiyo Bi Julieth J Nzugika amewasihi wazazi na wanajamii kwa ujumla kuzingatia ,kuheshimu na kuzidumisha haki za watoto ili waweze kufikia ndoto zao.

Amezitaja haki hizo kuwa ni kulindwa, kupewa elimu bora, kuwa na malazi salama na kusikilizwa, ambavyo ndio msingi imara utakaomwezesha mtoto kujitambua na kujithamini  kufikia ndoto anayoitazamia kwa maisha ya sasa na ya baadae.

Imeandaliwa na

Kitengo Cha Habari na uhusiano

Manispaa ya Kinondoni.