VYAMA VYA USHIRIKA KINONDONI VYAFANIKISHA UJENZI WA KISIMA MALOLO

Tarehe iliyowekwa: April 4th, 2024

Mkuu wa Wilaya ya Kinondoni Mheshimiwa Saad Mtambule amevipongeza vyama vya Ushirika kutoka Manispaa ya Kinondoni kwa kuchangia kiasi cha Shilingi Milioni Kumi katika ujenzi wa kisima katika Kituo cha mafunzo ya kilimo, ufugaji na uvuvi, Malolo kilichopo Mabwepande.

Mheshimiwa Saad alitoa pongezi hizo Aprili 4, 2024 wakati akizindua ujenzi wa kisima hicho chenye thamani ya Shilingi Milioni 16 ambacho kitatatua changamoto ya upatikanaji wa maji hasa wakati wa utoaji wa mafunzo ya Kilimo, Uvuvi na Ufugaji.

"Navipongeza sana vyama vya ushirika vya Manispaa ya Kinondoni kwa kufanikisha ujenzi huu wa kisima hiki, hongereni sana," alisema Mheshimiwa Saad.

Aidha, Mkuu wa Wilaya ameitaka Halmashauri ya Manispaa ya Kinondoni kupitia Kitengo cha Kilimo, Mifugo na Uvuvi kupanua wigo katika kutoa mafunzo kwa vijana wengi ili kuwawezesha kupata ajira kupitia sekta ya kilimo, ufugaji na uvuvi.