Kata ya Mbweni ni miongoni mwa Kata 20 za Manispaa ya Kinondoni. Asili ya jina Mbweni ni uwepo wa bandari kubwa ya asili iliyokuwa inatumika na Wareno enzi za ukoloni, jina ambalo wageni na wenyeji walilitumia wakimaanisha ni sehemu tulivu.
Sehemu ya BANDA MOJA, kwa sasa ni MITI 3 kulikuwa na makaburi ya Wahindi, Waarabu na Wasomali ambao wote walifika katika vipindi tofauti eneo la Mbweni kwa ajili ya kupakia na kushusha bidhaa zao kwa kutumia eneo la bandari lilikokuwa likijulikana kwa jina la STAHABUU ambalo kwa sasa kuna kambi ya kijeshi ya 19 (JKT). Uwepo wa bandari hii ulipelekea mji kutanuka haswa maeneo ya Mpiji na Teta.
Mtaa wa Teta ulikuwa na mashamba ya miembe, minazi na mikorosho. Bidhaa mbalimbali zilikuwa zinasafirishwa katika eneo hili zikiwemo vipusa na mchele kwenda Uarabuni kwa kutumia majahazi makubwa.
Eneo ambalo kwa sasa ni Mtaa wa Maputo kulikuwa na shamba enzi za ukoloni na Bagamoyo ilikuwa ni Makao Makuu. Kiongozi mkuu wa eneo hili alkuwa akifahamika kwa jina la GULAMRASSUR na alikuwa ni LALIWI, cheo kama cha Mkuu wa Wilaya (DC) kwa sasa. Kazi yake kubwa ilikuwa ni kusimamia mashamba na wakulima ambao walilazimishwa kulima mazao ya korosho na mihogo.
Mtaa wa Malindi Estate paliitwa MMARANII na palikuwa na jela ya watoto na msikiti ambao ulijengwa na mzungu aliyeitwa BELL ambapo kwa sasa ndio eneo la USALAMA WA TAIFA.
Mitaa
Kata ya Mbweni ina jumla ya Mitaa Mitano (5) ambayo ni; Mbweni, Malindi Estate, Mapatano, Mbweni mpiji na Mbweni teta
Mtaa wa Teta
Mtaa wa Maputo
Mtaa wa Mpiji
Mtaa wa Malindi Estate
Mtaa wa Mbweni
Idadi ya Watu
Kwa mjibu wa taarifa ya Sensa ya Mwaka 2022, Kata ya Mbweni ina jumla ya Wakazi 25970. Katika hao Wanaume ni 12502 na Wanawake ni 13468.
Hali ya Elimu
Kata ya Mbweni ina jumla ya Shule Kumi na Nne (14) ambazo zinajumuisha Shule za Awali/Msingi na Sekondari ambapo kuna Shule 08 za Awali/Msingi, 06 zikiwa chini ya miliki ya Taasisi Binafsi na 02 zinamilikiwa na Serikali. Shule za Sekondari ni 06 kwa ujumla wake, 04 zinamilikiwa na Sekta Binafsi na 02 ni za Serikali, kati ya Shule mbili zinazomilikiwa na Serikali moja ina kidato cha sita ambayo ni Mbweniteta.
Shule za Awali/Msingi za Serikali
-Mbweni na
-Kiumbageni
Shule za Awali/Msingi za Binafsi
-Hope and Joy
-Kings and Queens
-Mount Evarest
-Shausiye/Feza
Shule za Sekondari za Serikali
-Teta
-Mbweni
Shule za Sekondari za Binafsi
-Hope and Joy
-Shausiye/Feza
Idadi ya Wanafunzi
Hali ya Afya katika Kata
Kata ya Mbweni ina jumla ya Zahanati 02, Vituo vya Afya 03 na Hospitali 01
Zahanati za Serikali
-Zahanati ya Mbweni
-Zahanati ya Mpiji
Zahanati Binafsi
-Hakuna
Vituo vya Afya vya Serikali
-Kituo cha Afya Malindi
Vituo vya Afya Binafsi
-Armed Health Center
Hospitali za Serikali
-Hakuna
Hospitali Binafsi
-St Joseph Hospital
Miundo mbinu
Kata ya Mbweni ina Barabara Tano (5) za kiwango cha lami zikiwa na urefu wa km 20. Aidha Kata ya Mbweni katika Mitaa yake Mitano (5) ina jumla ya Barabara zipatazo 58.
Biashara na Uwekezaji
Kata ya Mbweni ina soko moja la Biashara la Mpiji, kituo kimoja cha Daladala (mabasi) na Bandari moja ya Mbweni pamoja na ufukwe wa JKT Mbweni. Uwepo wa vitu tajwa unawapa Wananchi na Wakazi wa Mbweni kujihusisha katika Biashara, Uvuvi na Ajira zikiwa shughuli kuu za Uchumi wao.
Miradi ya Maendeleo
Kata ya Mbweni imekamilisha miradi miwili ya Sekta ya Elimu na Biashara kwa kujenga Shule ya Sekondari ya Teta (picha) na ujenzi wa Soko la Mpiji (picha) ambapo miradi imeshakamilika.
Ulinzi na Usalama
Hali ya ulinzi na usalama ni shwari kabisa katika Kata ya Mbweni ambapo kuna vituo viwili (2) vya polisi cha Maputo na Masaiti lakini pia kila Mtaa wa Kata ya Mbweni kuna kikundi cha ulinzi shirikishi (sungusungu) kwaajili ya kuimarisha ulinzi na usalama wa Mtaa.
Idadi ya Maafisa ngazi ya Kata
Kata ya Mbweni ina Maafisa Ugani wapatao 14 katika mchanganuo ufuatao;
Afisa Mtendaji Kata 01
Watendaji Mitaa 05
Afisa Afya-01
Afisa Maendeleo ya Jamii-01
Afisa Kilimo-01
Afisa Mifugo-01
Afisa Uvuvi- 01
Mratibu Elimu Kata-01
Afisa Usitawi wa Jamii-01
Vivutio vya Utalii
Kata ya Mbweni ina vivutio viwili vya utalii kwa maana ya Bandari na Ufukwe wa JKT Mbweni.
