WANANCHI KATA YA MAKUMBUSHO WARIDHIA KUTOA MAENEO UJENZI WA MIUNDOMBINU YA BARABARA

Tarehe iliyowekwa: August 25th, 2022

Wananchi wa mitaa ya  Kisiwani, Mchangani na Sindano katika Kata ya Makumbusho, wameridhia kuachia baadhi ya maeneo katika makazi yao ili kupisha ujenzi wa barabara.

Mradi huo wa barabara yenye urefu wa kilomita 1.3 unaofadhiliwa na Benki ya Dunia, unaunganisha barabara ya Ndugumbi hadi Mwinyijuma.

Makubaliano hayo yamefikiwa leo katika mkutano wa hadhara uliohudhuriwa na Mstahiki Meya Manispaa ya Kinondoni, Mheshimiwa Songoro Mnyonge, na Diwani wa Kata ya Makumbusho Mheshimiwa Mohammed A. Mohammed.

Ujenzi wa barabara hiyo unaosimamiwa na mradi wa DMDP utakuwa na upana wa mita 10. Aidha, mradi huo utahusisha uwekaji wa taa za barabarani na njia za waenda kwa miguu.

"Tumekuja kuwaomba wananchi mkubali kuupokea mradi huu. Muachie baadhi ya maeneo yaliyozidi na kuwekewa alama ili mradi uanze, alisema Mheshimiwa Mohammed.

Kufuatia majadiliano hayo, wakazi hao kwa kauli moja waliridhia mradi huo. Mzee Mashaka Kino, alisema kuwa, "tangu mwaka 1971 tumekuwa tukiomba kupatiwa barabara hii, nawaomba wananchi wenzangu tuukubali."

Kwa upande wake, Meya Songoro aliwashukuru wakazi hao na kuelekeza ujenzi wa mradi huo uanze mara moja.  "Mradi huu unafaida nyingi, zikiwemo nyumba  zenu kupanda thamani, usalama, biashara kufanyika mchana na usiku na hata huduma ya daladala itapatikana."

Imeandaliwa Kitengo Cha Mawasiliano Serikalini Manispaa ya Kinondoni.