TIMU YA MADAKTARI WA MAMA SAMIA WAIPONGEZA HOSPITALI YA MABWEPANDE

Tarehe iliyowekwa: June 7th, 2024

Timu ya madaktari bingwa wanaozunguka Mikoa na Wilaya mbalimbali kutoa huduma za afya hapa nchini maarufu kama Madaktari wa Mama Samia wakiongozwa na Dkt. Mariam Gaitani wamepongeza mazingira mazuri ya huduma katika Hospitali ya Wilaya Mabwepande iliyopo Manispaa ya Kinondoni.

Pongezi hizo zimetolewa Juni 7, 2024 na Madaktari hao wakati wa hafla fupi ya kuagana na Madaktari hao waliokuwa wameweka kambi katika Hospitali ya Mabwepande kuanzia Juni 4 hadi Juni 7, 2024 iliyofanyika katika ukumbi wa mikutano uliopo katika Ofisi ya Mganga Mkuu wa Manispaa ya Kinondoni. "Tumefurahi mazingira mazuri ya Hospitali yenu, huduma zote muhimu tumezikuta, kwa kweli mmejipanga na majengo ni mazuri. Mtakuja kuwa Hospitali ya mfano mkiendelea hivi. Tunashukuru sana kwa mapokezi mazuri na ushirikiano mliotupa tangu tumekuja, kwa kweli tunashukuru" alisema kiongozi wa Madaktari hao Dkt. Mariamu Gaitani.

Wakati huo huo, Mkuu wa Wilaya ya Kinondoni Mheshimiwa Saad Mtambule ameipongeza timu hiyo ya Madaktari bingwa kwa kuendelea kutoa huduma za kiafya nchini. "Tunapenda kuwashukuru kwa mchango wenu mkubwa katika sekta hii ya Afya si kwa Kinondoni tu, bali pia kwa nchi nzima mlikopita."