TAASISI ZINAZOJIHUSISHA NA KUDHIBITI VVU NA UKIMWI MANISPAA YA KINONDONI ZATAKIWA KUONGEZA NGUVU KATIKA KUTOA ELIMU JUU YA WATU KUJUA NA KUPIMA AFYA ZAO.

Tarehe iliyowekwa: March 9th, 2018

 Mashirika na taasisi mbalimbali zinazojihusisha na masuala ya kupunguza Kasi ya maambukizi ya VVU Manispaa ya Kinondoni yametakiwa kuhakikisha yanaongeza nguvu katika kutoa elimu kwa jamii juu ya masuala ya kupima na kujua afya zao mapema. 

 Kauli hiyo imetolewa leo na Mwenyekiti wa kamati ya kudhibiti ukimwi  Manispaa hiyo Mh George Manyama alipokuwa katika ziara yake ya kutembelea taasisi zinazojihusisha na maswala ya kupunguza maambukizi ya VVU. na UKIMWI ambapo taasisi ya JHPIEGO na ICAP zimetembelewa. 

 Amesema  wananchi bado wanahitaji  elimu ya kutosha ili waweze kuishi kwa kuzingatia misingi na masharti  katika kuzilinda afya zao ambapo  amebainisha mashirika mengi kuweka nguvu katika kujua takwimu za Watu waliopata maambukizi na wasiopata maambukizi hali isiyotoa nafasi kwao kuijua afya yake na kujilinda. 

 Kwa upande wake Mratibu wa  kudhibiti ukimwi Manispaa ya Kinondoni ( CHAC), Bi Rhobi Gwesu amesema ipo changamoto kwa baadhi ya makundi ya jamii ambayo hayana uelewa wa kutosha kuhusiana na virusi vya ukimwi na ukimwi wenyewe.

 Amelitaja kundi hilo kuwa ni kundi la walemavu,na  hivyo Manispaa imejipanga kutoa elimu zaidi ya maswala hayo ya vvu na Ukimwi ili waweze kujilinda. 

 Kamati ya kudhibiti maambukizi ya VVU (Ukimwi) Manispaa ya Kinondoni inashiriki kikamilifu katika kufikia lengo la Kimataifa la watu asilimia 90 kujua hali zao za kiafya, Asilimia 90 wanaoishi na VVU kuwa wafuasi wa dawa za kupunguza makali na Asilimia 90 ya wanaotumia dawa waweze kufubaza makali ya ukimwi kufikia mwaka 2020.

 Imetolewa na
 Kitengo Cha Habari na Uhusiano
 Manispa ya Kinondoni.