"SASA HAMTADAI FEDHA ZA MATUMIZI PEKE YENU, NITAKUWA NANYI KUHAKIKISHA MNAPATA FEDHA ZA MATUMIZI ".

Tarehe iliyowekwa: March 9th, 2018

 NI KAULI YAKE MKUU WA MKOA WA DAR ES SALAAM MH PAUL MAKONDA KUELEKEA TAREHE 09/04/2018 SIKU ALIYOITANGAZA YA KUSIKILIZA KERO ZA WAKINAMAMA WALIOTELEKEZWA NA WAUME ZAO MKOANI KWAKE. 

 Mkuu wa Mkoa wa Dar Es Salaam Mh Paul Makonda amewataka wanawake wote waliotelekezwa na waume zao kufika ofisini kwake tarehe 09/04/2018 ili kuweza kusikilizwa matatizo yao na kupatiwa ufumbuzi kwa mujibu wa sheria. 

 Ameitoa kauli hiyo leo alipokuwa akiongea na wanawake wa Mkoa wa Dar es Salaam katika sherehe ya siku ya wanawake duniani yenye kauli mbiu isemayo "Kuelekea uchumi wa viwanda, tuimarishe usawa wa jinsia na uwezeshaji wa wanawake vijijini "

 Amesema katika Mkoa wake amebaini wanawake wengi kutelekezwa na waume zao na hivyo kufanya idadi kubwa ya watoto kulelewa na mzazi mmoja, na wengine kuua vichanga vyao na wengine kuwatupa watoto hali inayopelekea kuwa na watoto wengi wa mtaani.

 "Nimebaini wakinababa wengi wamewatelekeza wakinamama, wamewapa ujauzito na kuwaacha wakawafanya wakinamama kutoa mimba, wakawafanya wakinamama kuua vichanga vyao,  wakawafanya wadada wengi kufukuzwa majumbani kwao, wakati wao wamekaa wakistarehe pasipo kujali. ..sasa kinamama hamtateseka wala hamtadai fedha za matumizi peke yenu nitakua nanyi kuhakikisha mnapata fedha za hizo "Amesema Makonda

 Ameongeza kuwa kwa mujibu wa sheria ya mwaka 2009 iliyotungwa inayozungumnzia haki ya mtoto inamtaja baba moja kwa moja kama mlezi wa kwanza akishirikiana na Mama katika malezi ya mtoto.

 Maadhimisho haya ya siku ya wanawake yaliyofanyika kimkoa katika ukumbi wa Mlimani city pamoja na viongozi wa vyama na Serikali, pia yamehudhuriwa na vikundi mbalimbali vya wajasiriamali kutoka Manispaa ya Kinondoni, Ilala, Temeke, Kigamboni na Ubungo. 

 Imetolewa na
 Kitengo cha Habari na Uhusiano
 Manispaa ya Kinondoni.