NYUMBA ZA WALIMU CHACHU YA MATOKEO CHANYA ELIMU KINONDONI

Tarehe iliyowekwa: February 22nd, 2024

Mkuu wa Wilaya ya Kinondoni Mheshimiwa Saad Mtambule amesema uwepo wa nyumba bora na za  kisasa kwa walimu ni chachu ya matokeo chanya katika sekta ya elimu ndani ya Manispaa ya Kinondoni.

Mheshimiwa Saad aliyasema hayo  Februari 22, 2024 katika siku ya pili ya ziara ya Mkuu wa Mkoa wa Dar es Salaam, Mhe. Albert Chalamila,  iliyolenga kutembelea ujenzi wa miradi mbalimbali ya maendeleo inayoendelea kutekelezwa sambamba na usikilzaji wa kero kwa wananchi.

"Ujenzi huu wa nyumba bora na ya kisasa kwa walimu hawa wa shule ya sekondari Godwin Gondwe iliyopo Kata ya Kunduchi itaenda kusaidia kwa kiasi kikubwa katika kukuza na kuongeza ufaulu wa wanafunzi hawa kwani itakuwa na uangalizi mzuri na ufuatiliaji wa wanafunzi kwa ukatibu zaidi," alisema Mhe. Saad.

Aidha Mheshimiwa Mkuu wa Wilaya amewataka wanafunzi hao kuongeza bidii katika masomo yao kwani Rais wa Jamhuri ya Muungano wa Tanzania Dkt. Samia Suluhu Hassan  amekuwa mstari wa mbele katika uboreshaji wa mazingira katika sekta ya elimu.