MANISPAA YA KINONDONI YAPOKEA UGENI KUTOKA JUMUIA YA TAWALA ZA MITAA UGANDA.

Tarehe iliyowekwa: August 30th, 2017

Mstahiki Meya Manispaa ya Kinondoni Mh Benjamin Sitta leo amepokea ujumbe wa Maafisa thelathini na nane (38) wakiwemo watendaji wa idara ya fedha kutoka Jumuia ya Tawala za Mitaa Uganda(ALGA) kwa lengo la kujifunza na kubadilishana uzoefu katika maswala ya utendaji.

Ujumbe huo chini ya Mwenyekiti wake Ndugu Norman Birungi ulipata fursa ya kujifunza na kufanya majadiliano yaliyotokana na mada mbalimbali zilizowasilishwa kwao kutoka kwa wataalam wa idara ya Fedha, Mipangomiji, Uchumi na Ardhi wa Manispaa ya Kinondoni.

Mada zilizowasilishwa ni kuhusiana na ukusanyaji wa Mapato kwa njia ya mfumo (E payement System), mada kuhusiana na maswala ya uwekezaji pamoja na maswala ya Matumizi ya ardhi.

Katika kuthibitisha maneno kwa vitendo, ujumbe huo umetembelea miradi miwili inayosimamiwa na Manispaa ambapo ni mradi wa nyumba za makazi wenye vyumba thelathini na mbili (32),unaotekelezwa kwa kushirikiana na kampuni ya Centuary leisure ulioko eneo la Ugandan Avenue pamoja na mradi wa ujenzi wa vyumba arobaini na nane (48) unaotekelezwa na Manispaa kwa kushirikiana na kampuni ya Texas limited.

Miradi hiyo ni katika kutekeleza azma ya Halmashauri kwenye eneo la uwekezaji yenye lengo la kushirikisha wananchi wa Kinondoni katika kuibua miradi na pia kuongeza mapato.

Naye Mjumbe wa Jumuia ya Tawala za Mitaa Tanzania (ALAT) Bi Theresia Hinuma ameishukuru na kuipongeza Manispaa ya Kinondoni kwa maandalizi mazuri na mada zilizowasilishwa zenye manufaa na tija.

Imetolewa na
Kitengo cha Uhusiano
Manispaa ya Kinondoni