MAFUNZO YA LISHE KWA WASINDIKAJI WA VYAKULA MBWENI

Tarehe iliyowekwa: January 19th, 2024

Wajasiliamali  na wasindikaji wa vyakula mbalimbali katika Kata ya  Mbweni wamepatiwa mafunzo ya lishe ili kuweza kusindika vyakula vyao kwa kuzingatia  makundi matano ya chakula.

Mafunzo  hayo yametolewa na Halmashauri ya Manispaa ya Kinondoni kupitia Divisheni ya Kilimo, Mifugo na Uvuvi  katika kituo cha  Kilimo na Mifugo Malolo.

Akiongea katika mafunzo hayo Afisa Lishe wa Manispaa ya Kinondoni Bi. Emiliana Daud amesema wajasiriamali wanapaswa kuzingatia makundi matano ya chakula ikiwemo  kundi la mboga mboga na matunda pindi wanaposindika vyakula vyao.

"Mara nyingi vyakula hivi vinavyosindikwa vimekuwa vikitumia kundi la aina moja hivyo nichukue fursa hii kuwakumbusha wajasiriamali wote kuacha kutengeneza vyakula vya  lishe kwa kutumia nafaka za makundi ya aina moja ya chakula kwani husababisha magonjwa yasiyoambukiza ikiwemo kansa itokanayo na sumu kuvu pamoja na  kisukari," amesema Bi. Emiliana.

Kwa  upande wake Afisa Kilimo Bw . Juma Lukoo amewataka wakazi hao kutumia Kilimo mjini cha upandaiji wa mboga kwa kutumia mifuko ya plastiki, matairi mabovu, mifuko ya saruji na makopo.