"KUKATA MITI BILA UDHIBITI, KUNAHASARA NYINGI"

Tarehe iliyowekwa: June 5th, 2018

Ni kauli yake Makamu wa Rais wa Jamuhuri ya Muungano wa Tanzania Mh. Samia Suluhu Hassan, alipokuwa akihutubia katika kilele cha maadhimisho ya Mazingira yaliyofanyika Kitaifa  katika viwanja vya mnazi mmoja  Jijini Dar es Salaam.

Amesema katika kilele cha maadhimisho haya chenye kauli mbiu isemayo "Mkaa ni gharama, tumia nishati mmbadala", tunao wajibu wa kukumbushana na kuelimishana athari zitokanazo na ukataji wa miti kiholela.

Amezitaja athari hizo kuwa ni kukimbiza wanyama, kupoteza Matunda asilia, kuharibu makazi ya wadudu wenye kazi mbalimbali, kuharibu misitu inayotusaidia kunyonya joto au hewa ukaa na bahari kuingia eneo la mkazi ya watu.

Aidha Mh Samia Suluhu, ameainisha pia changamoto zitokanazo na uharibifu wa mazingira kuwa ni kuharibika kwa vyanzo vya maji, pamoja na mfumo wa ikolojia na kuwataka wananchi kuwa mstari wa mbele kulinda na kuheshimu mazingira ikienda sambamba na mikakati ya matumizi sahihi ya ardhi, pamoja na juhudi madhubuti zinazozingatia umuhimu huo zikilenga ukuaji wa uchumi wa viwanda.

Naye Waziri wa Nchi ofisi ya Rais Mazingira Mh Januari Makamba alipokuwa akimkaribisha Makamu wa Rais amesema siku ya kilele cha Mazingira ni siku ya kutathimi na kujiridhisha uwepo wa Uhusiano mkubwa kati ya Maendeleo na Mazingira,uliofungamana na ustawi wa wananchi wetu.

Akitoa salaam za mkoa wa Dar es Salaam, Mkuu wa mkoa huo Mh Paul  Makonda amezitaja changamoto zilizo katika mkoa wake kuwa ni swala la mafuriko linalopelekea nyumba kubomoka na wananchi kupoteza maisha, pamoja na uchafu wa Mazingira unaosababishwa  na wananchi wenyewe na kutangaza tarehe 01/07/2018 kuwa siku ya usafi mkoa wa Dar es salaam.

Aidha maadhimisho hayo yamehudhuriwa na viongozi mbalimbali wa vyama na serikali na kuburudishwa na vikundi vya ngoma, brass band pamoja na wimbo wa Mazingira kutoka kwa msanii wa kizazi kipya Beka flavour.

Imeandaliwa na

Kitengo cha Uhusiano na Habari

Manispaa ya Kinondoni.