KITUO CHA DALADALA MWENGE NI CHA WATANZANIA WOTE

Tarehe iliyowekwa: March 11th, 2024

Halmashauri ya Manispaa ya Kinondoni imetoa wito kwa wafanyabiashara wanaotoa huduma za usafirishaji abiria hapa nchini kusajili magari yao LATRA ili yatoe huduma katika kituo kipya cha daladala kilichopo Mwenge.

Wito huo umetolewa na Mkuu wa Divisheni ya Biashara, Viwanda na Uwekezaji wa Manispaa ya Kinondoni, Bw. Philipo Mwakibete, Machi 11, 2024 alipokuwa kwenye mkutano na waandishi wa habari uliofanyika katika kituo hicho uliolenga kujadili ustawi na maendeleo ya kituo hicho.

Katika kusisitiza hilo Bw. Mwakibete alisema, "Nawaomba wamiliki wa magari kutoka ndani ya Wilaya ya Kinondoni, Wilaya nyingine za Dar es Salaam pamoja na wale walioko nje ya Dar es Salaam wasajili magari hayo LATRA ili wayalete kutoa huduma za usafirishaji katika kituo cha Mabasi Mwenge. Mtanzania yeyote yupo huru kuingia kwenye kituo hiki."

Kituo hicho cha Daladala kina uwezo wa kuchukua kwa mara moja Daladala 100, Bajaj 20, Pikipiki 40 pia kina vibanda 21 vya kupumzikia abiria. Hadi sasa, zaidi ya Daladala 40 zinahudumia kituo hicho huku nyigine zikiendelea na ukamilishaji wa taratibu za usajili kwa ajili ya utoaji huduma.