KINONDONI YAWAJENGEA UWEZO MAAFISA USTAWI WANAFUNZI

Tarehe iliyowekwa: September 11th, 2020

Kinondoni kupitia kitengo cha Ustawi wa jamii kimeendesha mafunzo kwa maafisa ustawi  73 yanayohusu kuwajengea uwezo, ikiwa ni pamoja na kusimamia misingi na weledi unaoenda sambamba  na usimamizi wa Sheria katika kutekeleza majukumu yao ya kila siku.

Akifungua mafunzo hayo yaliyofanyika katika ukumbi wa DMDP, Mganga Mkuu wa Manispaa hiyo Dkt Samwel Laizer amesema kuwa mafunzo hayo Ni msingi madhubuti utakaowaongoza  katika kutekeleza majukumu yao katika Kata 20 za Halmashauri yetu ikiwa ni pamoja na vituo vya kutolea huduma za afya.

Amesema kazi ya ustawi wa jamii inahitaji weledi na uvumilivu wa hali ya juu kwani ni kazi ambayo muhusika hukutana na makundi mbalimbali ya watu ambapo wengi wao wanakuwa wanapitia changamoto tofauti za maisha.

"Hii kazi inahitaji kujitolea, wakati mwingine  ni kazi ya wito, mtakapokutana na changamoto mbalimbali  kwenye kutimiza majukumu yenu tutakuwa pale kuwasaidia ili nanyi muweze kupata kitu Cha kujifunza"

Naye Afisa ustawi wa jamii Manispaa ya Kinondoni,  Bi Judith Kimaro alipozungumza  amesisitiza umakini na usikivu katika kuzingatia matumizi ya lugha wakati wa  kutimiza majukumu yao kwani watakutana na makundi mbalimbali ya wahitaji huku akiwataka kuibua watoto wenye ulemavu wanaofichwa majumbani kwa dhana na Imani potofu, ili waweze kupatiwa haki zao za msingi.

Aidha amewataka kuzingatia suala la mavazi yenye staha, kwani ndio msingi imara wa utekelezaji wa majukumu yao unaoenda sambamba na nidhamu makazini,  utakaorahisisha uwajibikaji katika sekta hiyo.

Imeandaliwa na

Kitengo cha habari na uhusiano

Manispaa ya Kinondoni.