KINONDONI YATOA SEMINA ELEKEZI YA MATUMIZI YA MFUMO WA KIHASIBU WA UTOAJI TAARIFA ZA FEDHA (FFARS) KWA WATOA HUDUMA KWENYE VITUO NGAZI ZA CHINI.

Tarehe iliyowekwa: October 4th, 2017

 Manispaa ya Kinondoni yatoa semina elekezi ihusuyo Mfumo wa kihasibu na utoaji taarifa za kifedha katika vituo vya kutolea huduma ngazi za chini. 

 Semina hiyo iliyofunguliwa na Mwekahazina wa Manispaa Bw. Maximillan Tabonwa imefanyika leo katika ukumbi mdogo wa mikutano wa Manispaa uliopo Magomeni.

 Akifungua semina hiyo Maximilian amesema kwa kuwa sasa Serikali inakusudia kupeleka fedha moja kwa moja kwenye vituo vya kutolea huduma, Mfumo huu utasaidia kutoa na kutunza taarifa hizo za fedha kwa usahihi na kwa wakati. 

 Amezitaja faida zitakazopatikana kutoka kwenye mfumo huo kuwa ni Urahisi wa upatikanaji wa taarifa za kifedha ngazi ya chini, kuwa na uwazi katika matumizi, kupunguza gharama za uchapishaji wa vitabu vya matumizi ya Fedha kwa Halmashauri, pamoja na kuwa kumbukumbu nzuri ya kudumu ya matumizi ya fedha kwenye Serikali. 

 Aidha amewataka wahasibu hao kuwa makini katika kusikiliza, kuelewa, ili kuendana na matakwa ya mfumo huo kwa maswala ya matumizi na utunzaji wa taarifa za kifedha. 

 Semina hii imehusisha waalimu wakuu wa shule za Msingi na Sekondari, wahasibu wa vituo vya kutolea huduma ngazi za chini ambavyo ni vituo vya Afya, Zahanati pamoja na Hospitali. 

 Imetolewa na
 Kitengo cha Uhusiano
 Manispaa ya Kinondoni.