KINONDONI YAPONGEZWA KWA UTEKELEZAJI WA MKOPO WA ASILIMIA KUMI KWA VIJANA, WANAWAKE NA WALEMAVU

Tarehe iliyowekwa: November 25th, 2020

Pongezi hizo zimekuja Mara baada ya   timu ya wataalamu kutoka Mkoa wa Dar es salaam kufanya ziara kutembelea vikundi vya wanufaika wa mikopo hiyo ya asilimia kumi kwa vijana, wanawake na walemavu kwa Manispaa ya Kinondoni.

Kiongozi wa timu hiyo, ambaye pia ni mratibu wa dawati la uwezeshaji wananchi kimkoa Bi. Zubeda Salum Masoud ameongeza kuwa lengo kubwa ni kuangalia vikundi vinavyohusika na  uzalishaji  na jinsi walivyoitumia mikopo hiyo ikiwa ni pamoja na kutoa ushauri wa namna gani Serikali inaweza kuwasikiliza,  namna wanavyoweza kuuza na kupanua masoko yao.

"Kwa Kinondoni tumetembelea vikundi 8, Tumeviona vikundi vyote utendaji wao unaridhisha na mikopo ambayo wameipata inaendana na kile ambacho wameandika kwenye michanganuo yao, niwapongeze Sana wataalamu kwa Usimamizi mzuri" Ameongeza Bi Zubeda Salum

Aidha ameainisha changamoto kubwa zinazokabili vikundi hivyo  kuwa ni uelewa wa wafanyabiashara katika kutafuta masoko ili yaendane na ushindani wa soko, upatikanaji wa Cheti Cha viwango kutoka TBS, hali inayochangia kukosekana kwa masoko kutokana na kutokuwa na vyeti kamili.

Mratibu huyo ameahidi  kuwakutanisha wajasiriamali hawa na Taasisi mbalimbali zinazojihusisha na masuala ya kuongeza thamani ya bidhaa ikiwa ni pamoja na TBS, BRELA na kupata leseni za Biashara.

Kwa upande wake Afisa Maendeleo ya jamii Manispaa ya Kinondoni Bi Halima Kahema ameshukuru  kwa ujio wa wataalamu hao kwani kutaongeza chachu kwa wajasiriamali kujituma zaidi na kuzingatia ushauri wote wa kitaalamu waliopatiwa ikiwa ni pamoja na kuendelea kutoa mikopo kwa walengwa.

Vikundi vilivyotembelewa katika ziara hiyo ni pamoja na vile vinavyojihusisha na kilimo na ufugaji, utengenezaji wa bidhaa za ngozi, usindikaji wa viungo, uzalishaji wa vinywaji baridi pamoja na utengenezaji wa sabuni.

Imeandaliwa na

Kitengo cha Habari na uhusiano

Manispaa ya Kinondoni