KINONDONI YAKABIDHIWA CHUO CHA UFUNDI CHA TEGETA VOCATIONAL TRAINNING CENTRE

Tarehe iliyowekwa: August 27th, 2019

Akipokea chuo hiko kutoka kwa shirika lisilo la kiserikali la  Goodneighbours,  Mstahiki Meya  Manispaa ya Kinondoni Mhe Benjamin Sitta amesema chuo hiko kimekuja wakati mwafaka kwani Serikali inahitaji nguvu kazi kwa vijana ili kwa pamoja tuweze kusukuma gurudumu katika kuhakikisha sera ya nchi ya uchumi wa Kati wa viwanda inatekelezwa na viwanda hivyo  vinaendeshwa.

Amesema kunapopatikana fursa hizi ni lazima nguvu kubwa ielekezwe kwa vijana wetu  katika kuhakikisha elimu hiyo sahihi inatolewa ili kuendana na kasi ya Serikali yetu yenye sera ya  uchumi wa Kati wa viwanda inayohitaji vijana wenye ujuzi katika kuviendesha viwanda hivyo.

Awali alipozungumza  Mkurugenzi mkuu wa  shirika la Good neighbours Bw Hunggoo Ann amesema, wanaamini Kinondoni itaendeleza lengo la kujengwa kwa chuo hiko ambalo ni  kukuza kipato kwa vijana, kuwezesha kukuza vipaji katika fani mbalimbali na kupunguza umasikini kwa kuwapatia ujuzi ambao utaongeza vipato vyao.

Naye Mkuu wa chuo hiko Bw Ignas Kisindo amebainisha fani mbalimbali zinazotolewa katika chuo hiko kuwa ni pamoja na Ufundi umeme wa majumbani, Ushonaji, ICT, Udereva, Ufundi magari na udereva na udereva wa kijiko.

Katika hatua nyingine Meya Sitta ameahidi  kuwezesha mikopo ya vifaa wahitimu wanaomaliza masomo katika chuo hiko, ili waweze kujiajiri moja kwa moja.

Imeandaliwa na

Kitengo Cha Habari na Uhusiano

Manispaa ya Kinondoni.