KINONDONI YAKABIDHI MAHITAJI KWA WATOTO YATIMA

Tarehe iliyowekwa: April 5th, 2024

Halmashauri ya Manispaa ya Kinondoni imekabidhi misaada kwa watoto yatima wanaolelewa katika vituo vitano ndani ya Manispaa hiyo.

Makabidhiano hayo yalifanyika Aprili 5, 2024 wakati wa futari iliyoandaliwa na Mstahiki Meya wa Manispaa ya Kinondoni, Mhe. Songoro Mnyonge. Futari hiyo iliyohudhuriwa na viongozi wa dini, wafanyakazi na wadau mbalimbali, Mgeni rasmi alikuwa Mkuu wa Wilaya, Mheshimiwa Saad Mtambule.

Misaada ya chakula iliyokabidhiwa ni mchele, sukari, mafuta ya kupikia, chumvi, vinywaji na maharage. Vituo vilivyonufaika ni Mother of  Mercy, Al-Madina, Maunga Orphanage pamoja na Babu na Bibi Orphanage.

Akiongea wakati wa makabidhiano hayo, Mheshimiwa Mtambule aliwasisitiza Waislam wote kuishi maisha ya toba na kutoa sadaka kwa wasiojiweza katika kipindi hichi cha Ramadhan.

Alisema, "Mwezi huu ni mwezi wa toba hivyo hili jambo ni kubwa kwa Mwenyezi Mungu ambalo litachochea utulivu na amani pia kuchochea maendeleo ndani ya Wilaya yetu ya Kinondoni."