KINONDONI YAENDELEA KUADHIMISHA WIKI YA UPANDAJI MITI DUNIANI

Tarehe iliyowekwa: March 28th, 2024

Ikiwa ni wiki ya upandaji miti Duniani, Halmashauri ya Manispaa ya Kinondoni kupitia Kitengo cha Usafi wa Mazingira imeendelea kuadhimisha wiki hiyo kwa kupanda miti katika Shule ya Kinondoni Muslim na maeneo mbalimbali ya Mtaa wa Kinondoni Shamba.
Zoezi hilo limefanyika Machi 28, 2024 ikiwa ni moja ya kampeni ya Mguu kwa Mguu Kitaa iliyoanzishwa Manispaa ya Kinondoni kupitia Kitengo cha Usimamizi wa Taka na Usafishaji wa Mazingira ikiwa na lengo la kusikiliza na kutatua kero za usafi wa mazingira kwa wananchi wa mitaa yote ndani ya Manispaa ya Kinondoni.

Akiongea katika zoezi hilo Afisa Usimamizi wa Taka na Usafishaji wa Mazingira Bi. Nancy Zakayo amewataka Wananchi wa Kinondoni kupanda miti ili kutunza na kupendezesha mazingira yanayo wazunguka.
"Usafi ni ustaarabu na unaanza na wewe hivyo naomba kuwahamasisha sana wananchi wazidi kutunza mazingira kwa kupanda na kuitunza miti inayopandwa kwenye maeneo yao," amesema Bi. Nancy.