KINONDONI KUENDELEA KUTOA ELIMU YA UKIMWI

Tarehe iliyowekwa: June 10th, 2024

Halmashauri ya Manispaa ya Kinondoni kupitia Kamati ya UKIMWI  imekuja na mpango mkakati endelevu wa elimu na utoaji wa vipimo vya hiari vya ugonjwa wa UKIMWI ili kurahisisha utoaji wa huduma ya upimaji wa ugonjwa huo.

Hayo yamebainishwa na Mwenyekiti wa Kamati ya UKIMWI, ambae pia ni Naibu Meya na Diwani wa Kata ya Makongo, Mheshimiwa Joseph Rwegasira, katika kikao cha Baraza la Madiwani Robo ya Tatu kilichoketi Juni 10, 2024 katika ukumbi wa Manispaa ya Kinondoni.

"Kutokana na maazimio tuliyokubaliana katika kikao kilichopita cha Baraza, leo tumekuja na mpango huu wa kugawa vipimo vya kupima UKIMWI kwa Wananchi ili kurahisisha na kuongeza kasi ya upimaji wa ugonjwa huu ndani ya Wilaya yetu ya Kinondoni," alisema Mhe  Rwegasila.

Aidha, Mheshimiwa Rwegasira alisema kuwa licha ya Kamati hiyo kuweka nguvu kubwa katika kutoa elimu juu ya ugonjwa huo na ugawaji wa mipira ya kinga (kondomu), kuunda mipango mbalimbali pia amewasihi Wananchi hasa vijana kuwa na utamadumi wa kupima afya zao kila baada ya miezi mitatu ili kujua hali zao na kujiweka pazuri.

Kwa upande wake Mtoa huduma ya Afya kutoka Hospitali ya Magomeni, Bi. Martha Shija, alisema ni vyema Wananchi kujitokeza kuchukua vipimo hivyo katika maeneo yaliyoainishwa na kujipima wao wenyewe kwa hiari.