KINONDONI KUCHUKUA TAHADHARI YA MAGONJWA YA MLIPUKO

Tarehe iliyowekwa: January 16th, 2024

Mkuu wa Wilaya ya Kinondoni Mheshimiwa Saad Mtambule Januari 16, 2024  amekutana na Wajumbe wa Kamati ya Afya Msingi ya Wilaya ya Kinondoni ili kuweka mikakati mbalimbali juu ya tahadhari ya magonjwa ya mlipuko.

Katika kikao hicho moja ya mikakati iliyowekwa ni kuongeza kasi ya kufanya usafi kwa maeneo yote ya Manispaa ya Kinondoni  kila wiki siku ya  Jumamosi.

"Ili tuweze kuepukana na magonjwa ya mlipuko yatupasa kufanya usafi kila mwisho wa wiki siku ya  Jumamosi badala ya mwisho wa mwezi na elimu itolewe maeneo yote ndani ya Wilaya yetu," amesema Mhe. Mtambule.

Mhe. Mtambule ameongeza kuwa usafi utashirikisha wadau mbalimbali pamoja na kuonana na Wakandarasi waliopewa maeneo kwa ajili ya kufanya usafi kuona wana changamoto gani ili usafi ufanyike kikamilifu.

Ikumbukwe kuwa kikao hicho ni moja ya maagizo ya Mkuu wa Mkoa wa Dar es Salaam Mheshimiwa Albert Chalamila aliyoyatoa katika kikao kilichofanyika Januari 15, 2024 na Wakuu wa Wilaya, Wakurugenzi, Wataalamu na Watendaji kutoka Wilaya zote 5 za Mkoa huo kujadili swala la usafi na magonjwa ya mlipuko kama kipindupindu.