KINONDONI IKO TAYARI KUSHIRIKIA NA WADAU WA MAZINGIRA

Tarehe iliyowekwa: September 30th, 2023

Mkuu wa Wilaya ya Kinondoni Mhe. Saad Mtambule ameahidi kuendelea kushirikiana na wadau wa mazingira ili kuhakikisha mazingira yanakuwa safi na salama hata wakati wa mvua za mafuriko.

Mhe. Saad amesema hayo katika kongamano na wadau wa mazingira wakijadili hali ya usafi wa mazingira ndani ya Manispaa ya Kinondoni hasa katika kipindi cha mafuriko yanapotokea.

“Binafsi nichukue nafasi hii kuishukuru timu nzima ya Manispaa ya Kinondoni na wadau wote wa mazingira kwa kukubali na kuandaa kongamano hili ambalo litakuwa na manufaa makubwa ndani ya Wilaya yetu, hivyo niseme nitaendelea kushirikiana na wadau wote wa mazingira wakati wote,” amesema Mhe Saad.

Naye Mstahiki Meya wa Manispaa ya Kinondoni Mhe. Songoro Mnyonge ameziomba taasisi zote za wadau wa mazingira kuendelea kushirikiana na Manispaa ya Kinondoni katika kutoa ushauri na kutatua changamoto za kimazingira ndani ya Wilaya hiyo.