KAMATI YA FEDHA NA UONGOZI KINONDONI YATEMBELEA MIRADI YA MAENDELEO

Tarehe iliyowekwa: November 2nd, 2021

Kamati hiyo chini ya Mwenyekiti wake ambaye pia ni Mstahiki Meya wa Manispaa ya Kinondoni Mheshimiwa Songoro Mnyonge, leo tarehe 02 Novemba, 2021 wamefanya ziara ya ukaguzi wa miradi ya maendeleo kwa lengo la kujiridhisha na hatua za utekelezaji zilizofikiwa lakini pia kubainisha changamoto zilizopo na kuzitafutia hatua anuai za kukabiliana nazo.

Miradi iliyotembelewa na Kamati hiyo ni pamoja na miradi ya sekta ya elimu Kata ya Mbezi juu pamoja na mradi wa soko uliopo Kata ya Kigogo.

Katika sekta ya elimu Kamati hiyo imelenga kujiridhisha na changamoto iliyopo ya ujenzi wa madarasa katika maeneo yenye milima na makongoro hali inayopelekea ongezeko la gharama za ujenzi.

Kwenye sekta ya Biashara Kamati hiyo pia wamepata fursa ya kutembelea mradi wa soko la Kigogo lililofadhiliwa na Coca Cola lililopo Kigogo na wamekubaliana kulipokea na kulizindua kwa matumizi yaliyosahihi kwa maslahi mapana ya Halmashauri na wananchi kwa ujumla.

Ziara hiyo imehusisha Waheshimiwa Madiwani pamoja na Wakuu wa Idara na Vitengo.

Imeandaliwa na

Kitengo Cha Habari na Uhusiano.

Manispaa ya Kinondoni.