KAMATI YA BUNGE YAIPONGEZA KINONDONI KWA USIMAMIZI MZURI WA MIRADI YA MAENDELEO

Tarehe iliyowekwa: August 24th, 2024

Kamati ya Kudumu ya Bunge ya Elimu, Utamaduni na Michezo imeipongeza Manispaa ya Kinondoni kwa usimamizi mzuri wa miradi ya maendeleo inayoeendana na thamani ya fedha zilizotengwa kwenye miradi hiyo.

Pongezi hizo zimetolewa Agosti 24, 2024, katika  ziara iliyofanywa na kamati hiyo ambapo wametembelea miradi  mitano iliyopo Jimbo la Kinondoni na Kawe.

Moja ya miradi iliyotembelewa ni Shule ya Msingi ya Richard Mgana ambayo itagharimu Bilioni 1.1 mpaka ukamilisho wake, Stendi ya Mabasi Mwenge iliyogharimu Bilioni 12, Uwanja wa Mpira Mwenge utakaogharimu Bilioni 11.8 mpaka ukamilisho wake, Barabara za Jamirex zilizogharimu Bilioni 1 zenye urefu wa Km 1.07 na Ujenzi wa vyumba 18 na Matundu 33 ya vyoo Shule ya Sekondari Songoro Mnyonge utakaogharimu Bilioni 1.3.

Akiongea katika ziara hiyo Mwenyekiti wa Kamati hiyo  Mheshimiwa Justin Nyamoga amesema Kinondoni ni moja ya Manispaa ya mfano hapa Nchini katika utekelezaji wa miradi mikubwa ya maendeleo.

"Hakika Kinondoni ni Manispaa ya mfano na kuigwa katika utekelezaji na usimamizi wa miradi ya Maendeleo hususani miradi ya kimkakati kwani miradi hii ambayo tumeitwmbelea ni miradi bora na imeonesha thamani ya fedha iliyotengwa katika utekelezaji wa miradi kwani imetumika vizuri niwapongeze sana timu nzima ya Manispaa ya Kinondoni," alisema Mhe. Nyamoga.