JAMII IZINGATIE MAADILI ILI KUZUIA MAAMBIKIZI YA UKIMWI

Tarehe iliyowekwa: May 24th, 2024

Mwenyekiti wa Kamati ya Kudhibiti UKIMWI Halmashauri ya Manispaa ya Kinondoni, Mhe. Joseph  Rwegasira amewataka Wananchi kuzingatia malezi na maadili ya kitanzania ili kujikinga dhidi ya maambukizi ya Virusi vya UKIMWI. Ametoa wito huo katika Kikao cha Kamati ya Kudhibiti UKIMWI kilichofanyika katika Ukumbi wa Manispaa ya Kinondoni Mei, 24 2024. Mhe. Rwegasira amesisitiza utoaji wa elimu kwa Wananchi kuhusu athari za maambukizi ya Virusi vya UKIMWI na namna ya kujilinda.

"Kuna ongezeko kubwa la maambukizi ya Virusi vya UKIMWI katika jamii yetu hivyo jamii inapaswa ijilinde na ngono zembe hasa kwa Wanafunzi walipo kwenye Shule za Sekondari". Amesema, Mhe. Rwegasira.

Aidha,  Diwani wa Viti Maalum Mhe. Grace Mkumbwa amewaomba Wadau wa Elimu kuelimisha jamii namna ya kujikinga na maambukizi ya Virusi vya UKIMWI Mashuleni  kwa kuanzisha vipindi na semina mbalimbali ambazo zinatoa elimu ya kujikinga na ugonjwa huo pamoja na kuzingatia maadili.

"Inabidi ziwepo semina za kutosha zinazohusiana na elimu ya kudhibiti maambukizi ya Virusi vya UKIMWI kwa Wanafunzi hivyo Wadau wa Elimu simamieni maadili ya Walimu kuanzia mavazi mpaka tabia zao kwani wao wanapaswa kuhakikisha Wanafunzi wanafata maadili yaliyo bora". Amesema, Mhe. Mkumbwa.