IMARISHENI MAHUSIANO MAZURI ILI KUING'ARISHA KINONDONI

Tarehe iliyowekwa: May 27th, 2024

Mkuu wa Wilaya ya Kinondoni Mheshimiwa Saad Mtambule amewataka Watendaji na Wakandarasi kuimarisha mahusiano mazuri ili kung'arisha mazingira ndani ya Wilaya ya Kinondoni. Mhe. Mtambule aliyasema hayo Mei 27, 2024 katika Kikao kilichofanyika katika Ukumbi wa Manispaa ya Kinondoni alipokuwa akizungumza na Watendaji wa Kata zote 20 sambamba na Wakandarasi wanaojihusisha na huduma ya utoaji wa taka katika maeneo yote.

"Imarisheni Mahusiano na Mawasiliano mazuri katika kujulishana na kujadiliana jinsi ya kuondoa taka na kumfanya kila mmoja atambue wajibu wake katika kusafisha mazingira. Alisema, Mhe. Mtambule.

Pia, amewataka kuweka kipaumbele katika maeneo yenye masoko na magulio na kuhakikisha taka zinatolewa kwa wakati.

"Wakandarasi na vikundi vya usafi wekeni kipaumbele katika maeneo ya Fukwe, Magulio na Masoko ili kuhakikisha jamii inajikinga na magonjwa ya milipuko".

Aidha, Mkuu wa Wilaya aliwataka Maafisa Mazingira na Maafisa Afya kuhamasisha usafi katika maeneo yote na kusimamia sheria kwa wanaochafua mazingira. Pia, Mhe. Mtambule alizuia utoaji wa vibali vya utupaji wa taka katika maeneo ya Kinondoni na kutaka hatua kali zichukuliwe dhidi yao ikiwemo ulipaji wa faini.