HONGERENI KWA USIMAMIZI MZURI WA MIRADI

Tarehe iliyowekwa: July 21st, 2023

Mkurugenzi wa Halmashauri ya Manispaa ya Kinondoni Bi. Hanifa Suleiman Hamza amewapongeza Maafisa Elimu Kata na Waalimu Wakuu wa shule zote za Msingi kutoka  Manispaa ya Kinondoni kwa utekelezaji na usimamizi mzuri wa miradi ya shule itokanayo na fedha za BOOST.

Bi. Hanifa ametoa pongezi hizo leo Julai 21, 2023 wakati akifungua kikao chenye lengo la kujadili na kutathmini utendaji kazi kwa walimu wa shule za msingi kutoka Wilaya ya Kinondoni.

"Nichukue nafasi hii kuwapongeza walimu wa shule zote kwa usimamizi na utekelezaji wa miradi ya shule kwa fedha za BOOST kwani Manispaa ya Kinondoni bado ni kinara katika usimamizi na utekelezaji wa miradi hii ya BOOST", amesema Bi. Hanifa.

Aidha, Mkurugenzi amewaomba walimu hao kusimamia vyema malezi ya watoto wanapokuwa shuleni kwani wakifanya hivyo itasaidia kwa kiasi kikubwa kupunguza masuala ya ukatili wa kijinsia dhidi ya watoto.

Lakini pia Bi. Hanifa amewakumbusha walimu hao kufanya kazi kwa ushirikiano na umoja baina yao ili waweze kuongeza ufaulu mkubwa kwa wanafunzi wao.

Imeandaliwa na Kitengo cha Mawasiliano Serikalini:

Halmashauri ya Manispaa ya Kinondoni.