"HAKUNA TIMU KUBWA ZAIDI YA KMC FC"

Tarehe iliyowekwa: February 18th, 2023

Mkurugenzi wa Manispaa ya Kinondoni, Bi. Hanifa Suleiman Hamza, amewatoa hofu wachezaji wa KMC FC kuwa hakuna timu ya soka kubwa zaidi yao.

Bi. Hanifa ameyasema hayo alipokutana na baadhi ya viongozi wa timu hiyo walioambatana na kikosi cha KMC FC leo katika ukumbi wa Manispaa.

Aliwaeleza wachezaji hao kuwa KMC FC kwa sasa imepata basi kubwa ambalo litawawezesha wachezaji kusafiri vizuri. Aliongeza kuwa, " tutakuwa timu ya pili kuwa na uwanja mkubwa wenye vifaa vya kisasa". Manispaa ipo kwenye hatua za ukamilishaji uwanja wa mpira uliopo Mwenge, jijini Dar es Salaam.

"Hakuna timu kubwa zaidi yetu, tunaweka mazingira mazuri na bora zaidi kwa timu yetu kuweza kufanya vizuri", alisema.

Naye Naibu Meya wa Manispaa, Mheshimiwa Josephat Rwegasira, aliitaka timu hiyo kuhakikisha inafanya vizuri katika mechi zake mane zilizobaki.

Kwa upande wao Mwenyekiti na Makamu Mwenyekiti wa timu hiyo walimpongeza Mkurugenzi kwa mwelekeo wake wa kuboresha mazingira ya timu.

Mheshimiwa Rwegasira alisema, "KMC FC ni sura ya Manispaa ya Kinondoni, tupo tayari kutoa fedha kwa ajili ya naendeleo yake".

Nao baadhi ya wachezaji wamemshukuru Bi. Hanifa kwa kuwawezesha kupata basi kubwa litakalo wawezesha kusafiri mikoani bila kuchoka.

Imeandaliwa na Kitengo cha Mawasiliano Serikalini:

Manispaa ya Kinondoni