DC GONDWE: WAZAZI, WALEZI TOENI USHIRIKIANO KAMPENI YA CHANJO YA POLIO AWAMU YA 3

Tarehe iliyowekwa: August 31st, 2022

Kamati ya Afya ya Msingi Manispaa ya Kinondoni imefanya kikao leo kujadili juu ya kampeni ya utoaji wa chanjo ya matone ya Polio awamu ya tatu kwa watoto walio chini ya umri wa miaka mitano.

Kamati hiyo chini ya Mwenyekiti wake ambaye pia ni Mkuu wa Wilaya ya Kinondoni Mheshimiwa Godwin Gondwe amewasisitiza wazazi na walezi kuwapa ushirikiano wataalamu wa afya kwa kuwatoa watoto wao waweze kupata chanjo ya matone ya Polio ili kuwakinga na ugonjwa wa kupooza(POLIO).

Gondwe amesema Manispaa ya Kinondoni inatarajia kuwafikia watoto walio chini ya umri wa miaka mitano wapatao 223,541 kwa muda wa siku nne za kampeni kuanzia tarehe 1 hadi 4 Septemba, 2022.

Kikao hicho kimehudhuriwa na Mkurugenzi wa Manispaa ya Kinondoni Bi. Hanifa Suleiman Hamza, Mganga Mkuu wa Manispaa ya Kinondoni Dkt. Samwel Laizer, Kamati ya Ulinzi na Usalama ya Wilaya, pamoja na baadhi ya watumishi wa Manispaa.

Imeandaliwa na

Kitengo cha Mawasiliano Serikalini

Manispaa ya Kinondoni.