DC CHONGOLO AFANYA ZIARA UKAGUZI WA MIUNDOMBINU SHULE YA MSINGI BOKO

Tarehe iliyowekwa: November 12th, 2020

Mkuu wa Wilaya ya Kinondoni, Mhe. Daniel Chongolo ametembelea  shule ya msingi Boko kwa lengo la kukagua changamoto zilizojitokeza katika miundombinu ya shule hiyo kutokana na mvua zinazoendelea kunyesha.

Akizungumza na uongozi wa shule katika ziara hiyo  Mhe. Chongolo ameeleza kuwa eneo hilo  limekuwa na changamoto ya kujaa maji nyakati za mvua na kwamba linapaswa kufanyiwa ukaratabati wa haraka ili kuepuka madhara makubwa yanayoweza kujitokeza.

Amesema "Ukiangalia hapa miundombinu ya shule siorafiki kwa watoto kutokana na changamoto hii ya kujaa maji wakati wa mvua, hapa tunaona maji yamezunguka shule, na ni mvua ya siku mbili tu iliyonyesha, sasa natoa wiki mbili, nitarud hapa tarehe 25 kuangalia nini kimefanyika, pesa zipo zifanye kazi kwa ajili ya watoto wetu wasome kwenye mazingira mazuri” Mhe. Chongolo.

Awali Mhandisi wa Manispaa hiyo Ndg Mkelewe Tungaraza alimueleza Mkuu wa Wilaya hatua anuai zilizokwisha chukuliwa kwa lengo la kutatua changamoto hiyo iliyodumu kwa muda mrefu hasa kipindi Cha mvua.

“ Mhe. Mkuu wa Wilaya , Manispaa tulishatenga kiasi cha fedha za kitanzania  milioni 70, na ujenzi huu wa mifereji tutatumia mfumo wa Force Account, hadi sasa tunavyo zungumza pesa zipo tayari na kinachofanyika hivi sasa tunaongea na mkandarasi ili ujenzi huu uanze haraka iwezekanavyo” amesema Mhandisi Tungaraza.

Katika ziara hiyo, Mhe. Chongolo aliambatana na Afisa Elimu Msingi, Mchumi, Mkuu wa Idara ya Ardhi, Mipango miji na Maliasili pamoja na Afisa Mazingira wa Manispaa ya Kinondoni.

Imeandaliwa na

Kitengo cha Habari na Uhusiano.

Manispaa ya Kinondoni