DABREW CHAREJESHWA SERIKALINI

Tarehe iliyowekwa: May 2nd, 2024

Kiwanda cha Darbrew, kilichopo Ubungo, kimerejeshwa Serikali ya Mkoa wa Dar es Salaam.

Makabidhiano ya kiwanda hicho yalifanyika Mei 02, 2024 chini ya uangalizi wa Mkuu wa Mkoa wa Dar es Salaam, Mheshimiwa Albert Chalamila na kushuhudiwa na Meya wa Manispaa na Jiji, Katibu Tawala wa Mkoa, Dk. Toba Nguvila, Wakuu wa Wilaya za Mkoa wa Dar es Salaam pamoja na Wakurugenzi wa Manispaa na Jiji.

Akizungumza wakati wa makabidhiano hayo, Mheshimiwa Chalamila alisema, "kiwanda kitahuishwa ili kiwe cha kisasa na kizalishe vinywaji vyenye ubora."

Aliongeza kuwa hayo yanafanyika kwa maelekezo ya Rais wa Jamhuri ya Muungano wa Tanzania, Dkt Samia Suluhu Hassan, kwa lengo la kusimamia na kuboresha mazingira ya uwekezaji Mkoani Dar es Salaam.

Aidha,  TBL wamemhakikishia mkuu wa Mkoa kuendelea kutoa ushirikiano kwa Serikali ya Mkoa hadi hatua ya mwisho ya makabidhiano hayo.

Makabidhiano hayo yalihusisha nyaraka mbalimbali, ikiwemo cheti cha usajiri wa Kampuni, kadi za magari 17, hati miliki ya kiwanda, mahesabu ya Kampuni pamoja na orodha ya mali zilizohakikiwa.