"AHIMIZA UADILIFU WAKATI WA SENSA" DC GONDWE KINONDONI

Tarehe iliyowekwa: July 28th, 2022

Mkuu wa Wilaya ya Kinondoni, Mheshimiwa Godwin Gondwe amehimiza uadilifu kwa makarani wa sensa wakati wa zoezi la sensa ya watu na makazi inayotarajiwa kufanyika mwezi Agosti 23, 2022. 

Mheshimiwa Gondwe ameyasema hayo alipokuwa akiongea na wakufunzi wa sensa 190 waliohitimu mafunzo ya siku 21 katika Manispaa ya Kinondoni.

Akizungumza na wakufunzi hao leo katika ukumbi wa Manispaa ya Kinondoni, Mheshimiwa Gondwe alisema kuwa, “Sensa ni jambo la kitaifa na la kimkakati ambalo litawagusa watu kwa miaka 10 mingine ijayo, hivyo hatutakiwi kukosea hata kidogo wala kuwaruka watu kuhesabiwa, Mkaifanye kazi hii kwa uadilifu mkubwa.”

Aidha aliwaeleza wakufunzi hao kuwa wanatakiwa kwenda kuwafundisha Makarani wa Sensa uzalendo, maadili ya kazi na kusimamia miongozo ya kazi hiyo. Jumla ya Makarani 4,800 kati ya zaidi ya watu 12,000 walioomba kazi hiyo, walichaguliwa kushiriki zoezi la kuhesabu watu. 

 Imeandaliwa na

 Kitengo cha Mawasiliano Serikalini 

 Manispaa ya Kinondoni.