AFISA ELIMU MSINGI KINONDONI APONGEZWA

Tarehe iliyowekwa: May 19th, 2023

Baraza la Madiwani la Manispaa ya Kinondoni, limempongeza Mkuu wa Divisheni ya Elimu Msingi kwa hatua za ubunifu kwa lengo la kuinua ufaulu.

Pongezi hizo zimetolewa leo Mei 19, 2023 wakati wa kikao cha Baraza la Madiwani cha Robo ya Tatu lililoketi katika ukumbi wa Manispaa.

"Mstahiki Meya, tunaomba kumpongeza Afisa Elimu Msingi, Bi. Theresia Kyara, kwa hatua zake nzuri za ubunifu na ufaulu kwa shule zetu za msingi. Hatua hii ya pongezi iwe pia chachu kwa Wakuu wengine wa Divisheni na Vitengo katika utendaji wao wa kazi," alisema Diwani wa Kata ya Kigogo, Mheshimiwa Richard Mgana.

Naye Mstahiki Meya, Mheshimiwa Songoro Mnyonge, alilieleza Baraza hilo kuwa Manispaa imefanikiwa kuongoza katika matokeo ya Darasa la Saba kitaifa na kimkoa kwa matokeo yaliyopita.

Divisheni ya Elimu Msingi imefanikiwa kuanzisha shule sita ambazo zinatumia lugha ya Kiingereza katika kufundisha.