RC MAKALLA ASHUHUDIA MAMIA YA WANANCHI WAKIFURIKA FUKWE YA OYSTERBAY

Tarehe iliyowekwa: October 16th, 2021

NI KUFUATIA ONESHO KUBWA LA TAMASHA LA UTALII LIITWALO "DAR SUNSET CARNIVAL"

-Àkiri tamasha kufanikiwa  kwa 100%

- Atangaza  uzinduzi rasmi kufanywa na Waziri Mkuu Mheshimiwa Kassim Majaliwa

- Abatiza Wafanyabiashara wa Coco kwa jina la Watoto wa Rais Mama Samia na kuwahakikishia hakuna atakayeondolewa

- Wananchi wafurahia burudani na kupongeza ubunifu uliotumika

Mamia ya wananchi na wapenzi wa burudani wamefurika kwa wingi kwenye tamasha kubwa la utalii  la DAR SUNSET CARNIVAL lililofanyika siku ya Jumamosi tarehe 16 Oktoba, 2021 katika fukwe ya Oysterbay ambapo Mkuu wa Mkoa wa Dar es Salaam Mheshimiwa Amos Makalla alikuwa mgeni rasmi.

Akizungumza wakati wa tamasha hilo RC Makalla amesema baada ya maandalizi yote kukamilika kwa kiwango kusudiwa, tamasha rasmi litazinduliwa na Waziri Mkuu Mheshimiwa Kasim Majaliwa ambapo litaambatana na shamra shamra nyingi za burudani.

Aidha RC Makalla amesema tukio la leo limefanikiwa kwa kiasi kikubwa kutokana na ubunifu wa maandalizi na mwamko mkubwa wa wananchi waliojitokeza.

Hata hivyo RC Makalla amesema maboresho ya ufukwe wa Oysterbay yatawezesha kuchukuwa wafanyabiashara wengi zaidi ya waliokuwepo ambapo amebainisha kuwa lengo la Serikali ni kuwajali wafanyabiashara pamoja na kukuza utalii wa fukwe kupitia fukwe zote za Mkoa huu.

Pamoja na hayo RC Makalla amepongeza kampuni zote zilizokubali kushirikiana na Serikali kujenga vibanda vya kisasa bure na kusema matarajio ni kuona siku zijazo ujenzi wa vibanda vyote vinakamilika.

Maboresho ya ufukwe wa Oysterbay yamejumuisha usafi wa fukwe, ujenzi wa vibanda vya kisasa, ujenzi wa vyoo, miundombinu ya maji, umeme na kuhakikisha huduma zote za kifedha zinapatikana eneo hilo.